www.SEN.az Sənin Əyləncən Sənin Dünyan
Azərbaycan üzgüçüləri 29 aprel – 1 may tarixlərində Çexiyanın Ostrava şəhərində keçiriləcək beynəlxalq turnirdə iştirak edəcək.
Sen.Az xəbər verir ki, bu yarış həm bu il Macarıstanın paytaxtı Budapeştdə, həm də 2023-cü ildə Yaponiyanın Fukuoka şəhərində keçiriləcək dünya çempionatına lisenziya xarakteri daşıyır.
Azərbaycan Üzgüçülük Federasiyandan verilən məlumata görə, turnirdə ölkəmizlə yanaşı İsveçrə, Ukrayna, Rumıniya, Polşa, Macarıstan, Xorvatiya, Çexiya və Gürcüstandan idmançılar öz güclərini sınayacaqlar. Bu yarışda Azərbaycan yığma komandasını yeni tərtib olunmuş normativ cədvəlinə uyğun normativləri yerinə yetirmiş Ramil Vəlizadə, Məryəm Şeyxəlizadəxangah, Rəşad Alquliyev və Əbdürrəhman Rüstəmov təmsil edəcək.
Üzgüçülük üzrə yığmanın baş məşqçisi Rəşad Əbdürrəhmanovun sözlərinə görə, komanda bu yarışa əzmlə hazırlaşıb:
“Bu yarış komandamızın dünya çempionatına lisenziya qazanması baxımından çox önəmlidir. Ümid edirik ki, üzgüçülərimiz bu yarışda öz göstəricilərini daha da yaxşılaşdıraraq finala vəsiqə qazananlar sırasında olacaqlar. Bu turnirdə çox güclü idmançılar iştirak edəcəklər. Çox çalışırıq ki, Azərbaycan üzgüçüləri ən yaxşı nəticələr göstərənlər sırasında olsunlar”.
www.SEN.az
