3×3 basketbol millimiz Dünya Qadın Seriyasının vitse-çempionu olub

Bakı. Trend:

13-14 sentyabr tarixlərində Çinin Şanxay şəhərində qadınlardan
ibarət millimizində iştirak etdiyi 3×3 basketbol üzrə Dünya Qadın
Seriyasının final mərhələsinin oyunları keçirilib.

Trend xəbər verir
ki, qadın millimiz yekun mərhələnin ilk qrup oyununda Kanada
seçməsinə 13:21 hesabı ilə məğlub olsa da, 2-ci və 3-cü oyunlarda
müvafiq olaraq Niderland U-25 yığmasına 21:19, “Rapid” (Rumıniya)
klubuna 19:15 hesabları ilə qalib gələrək, 1/4 finala vəsiqə
qazanıb.

<!—->
<!––>

Millimiz 1/4 finalda Monqolustanın “Ulaanbaatar Amazons” klubunu
əlavə vaxta gedən oyunun yekununda 19:17 hesabı ilə məğlub etdikdən
sonra, yarımfinalda yenidən Niderland yığması ilə üz-üzə gəlib və
21:19 hesablı qələbə qazanaraq 3×3 basketbol tariximizdə ilk dəfə
milli komanda olaraq iştirak etdiyimiz Dünya Qadın Seriyasının
final mərhələsində finala yüksəlib.

Həlledici görüşdə millimiz final mərhələsinin favorit komandası
sayılan güclü Kanada yığması ilə qarşılaşıb və 12:21 hesabı ilə
məğlub olaraq vitse-çempion ünvanına yiyələnib.