www.SEN.az Sənin Əyləncən Sənin Dünyan
Xəzər dənizinin sahilində 320-dən çox suiti cəsədi tapılıb.
Metbuat.az SEN.az-a istinadən xəbər verir ki, bu barədə “TASS” məlumat yayıb.
“Sulak çayının mənsəbindən Terek çayına qədər 322 suiti cəsədi aşkar edilib”, – deyən mənbə aşkar edilən ölü heyvanların sayının arta biləcəyini qeyd edib.
Bundan əvvəl Dağıstan Təbii Sərvətlər Nazirliyinin teleqram kanalı xəbər verib ki, nazirliyə suitilərin ölümü ilə bağlı xəbərlər daxil olmağa başlayıb. Nazirlik qeyd edib ki, mütəxəssislər sahil zolağında yerində araşdırmaya başlayıblar.
Nazirlik əlavə edib ki, Xəzər suitilərinin tələfi hər il məməlilərin miqrasiya dövründə baş verir. Alimlər hesab edirlər ki, bu hadisənin əsas səbəbi seysmik aktivliklə bağlı olan dəniz dibindən təbii qazın ayrıldığı ərazilərdən keçərkən heyvanların boğulmasıdır.
Xəzər suitisi və ya nerpası Xəzər dənizində yaşayan yeganə məməli heyvandır. 2008-ci ildə Beynəlxalq Təbiəti Mühafizə Birliyi onu təhlükə altında olan heyvanlar siyahısına daxil edib.
